Për të sqaruar publikun mbi statusin ligjor dhe administrativ të projektit të zhvilluar nga GENER 2 në zonën e Velipojës, po paraqesim më poshtë disa fakte të verifikueshme dhe të mbështetura në dokumentacionin përkatës.

Ky projekt është konceptuar si një investim me rëndësi strategjike për zhvillimin turistik të zonës dhe për ekonominë lokale, dhe është ndjekur mbi bazën e procedurave ligjore dhe administrative të parashikuara nga kuadri në fuqi.

1. Projekti është pajisur me lejen përkatëse nga autoritetet kompetente, pas ndjekjes së procedurave përkatëse ligjore, teknike dhe administrative, sipas dokumentacionit të administruar në këtë proces.
2. Pretendimet e bëra publikisht deri më sot nuk kanë rrëzuar bazën dokumentare mbi të cilën është zhvilluar projekti. Çdo pretendim i mundshëm duhet të trajtohet mbi bazën e dokumenteve dhe përmes institucioneve kompetente.
3. Roli i GENER 2 në këtë proces është ai i palës ndërtuese duke hyrë në marrëdhënie kontraktuale me palën që ka qenë e dokumentuar si mbajtëse e të drejtave përkatëse mbi truallin. Pretendimet e bëra publikisht deri më sot nuk kanë prodhuar një bazë ligjore që të cenojë statusin e dokumentuar mbi të cilin kompania ka vepruar.
4. Kompania mbetet e gatshme të vërë në dispozicion të institucioneve, mediave dhe çdo pale të interesuar informacionin dhe dokumentacionin përkatës, në përputhje me kufijtë ligjorë dhe proceduralë. Qëndrimi ynë ka qenë dhe mbetet i bazuar në dokumente, fakte dhe proces të rregullt institucional.
5. Nuk na rezulton të ekzistojë as edhe një akt pezullues ndaj vijimit të projektit. Prona dhe procesi përkatës kanë kaluar fazat e shqyrtimit të nevojshëm sipas kuadrit përkatës, dhe mbi këtë bazë nuk rezulton ndonjë pengesë ligjore për vijimin normal të punimeve.
6. Procesi gjyqësor i paraqitur në disa raste në media si “fitore” nuk lidhet me parcelën apo perimetrin ku po zhvillohet projekti i GENER 2 në zonën e Velipojës.Sipas dokumentacionit të administruar nga kompania, këto procese nuk cenojnë sipërfaqen objekt të zhvillimit dhe nuk ndryshojnë statusin ligjor të parcelës mbi të cilën po zbatohet investimi.
7. Pretendimi se kompania ka uzurpuar truall pa dokumentacion ligjor nuk qëndron mbi bazën e dokumentacionit kontraktual dhe të titullit mbi të cilin është mbështetur transaksioni. Sipas dokumentacionit të administruar për territorin objekt zhvillimi, sipërfaqja e përfshirë në projekt është trajtuar si pronë private.
8. Nuk na rezulton të jetë provuar një e drejtë trashëgimore mbi sipërfaqen objekt të projektit. Çdo pretendim i tillë, nëse ekziston, duhet të vlerësohet vetëm mbi bazën e akteve përkatëse dhe nga autoritetet kompetente.
9. Kompania nuk ka nxitur tensione në terren dhe ka marrë masa për mbrojtjen e personelit. Përkundrazi, pas incidenteve të përsëritura ndaj punonjësve dhe pajisjeve në funksion, është parë e nevojshme kontraktimi i një subjekti privat të licencuar për sigurinë, me qëllim mbrojtjen e personelit dhe të aseteve, në përputhje me nevojat operative të projektit.
10. Në një shtet të së drejtës, çdo çështje që lidhet me pronësinë, vlefshmërinë e dokumentacionit apo ligjshmërinë e proceseve trajtohet vetëm përmes institucioneve kompetente dhe mbi bazën e dokumenteve.

Kompania mbetet e hapur për çdo verifikim institucional dhe për çdo shqyrtim të bazuar në dokumente, duke ritheksuar se asnjë çështje e tillë nuk mund të zgjidhet përmes presionit publik, tensioneve në terren apo interpretimeve të njëanshme.